រៀនធ្វើទឹកប្រទាលកន្ទុយក្រពើញុំា តាមវិធីងាយៗ

កម្សាន្ត៖ ប្រទាលកន្ទុយក្រពើត្រូវបានគេស្គាល់ថា ជាប្រទាលដែលមានសារៈប្រយោជន៍ជាច្រើនដល់មនុស្សយើង។ យើងឃើញគេយកវាទៅធ្វើជាឳសថព្យាបាលសម្រស់ដូចជា ម៉ាស់បិតលើមុខ​ ក្រែម ជាដើម។ ជាពិសេសវាជាភេសជ្ជៈដ៏ឆ្ងាញ់ ហើយថែមទាំងជំនួយដល់សុខភាពទៀតផង ។ យើងអាចធ្វើ ទឹកប្រទាលកន្ទុយក្រពើ ញុំានៅផ្ទះបានដោយប្រើប្រាស់គ្រឿងផ្សំនិងវិធីធ្វើដ៏សាមញ្ញខាងក្រោម៖

គ្រឿងផ្សំ៖

១. ប្រទាលកន្ទុយក្រពើ ៣គីឡូក្រាម

២. ស្ករស ៣០០ក្រាម

៣. ស្លឹកតើយ ៤សន្លឹក

៤. ទឹកក្រូចឆ្មា (ច្របាច់ចេញពីក្រូចឆ្មា ៥ផ្លែ)

៥. ទឹកឃ្មុំ ៥ស្លាបព្រាកាហ្វេ

៦. អំបិល ១ស្លាបព្រាកាហ្វេ

របៀបធ្វើ៖

១. ចិតសំបកប្រទាលកន្ទុយក្រពើលាងទឹកឲ្យស្អាត ហើយយកវាទៅចិតជាចំណិតតូចៗ។

២. ចំពោះទឹកទី១ ដាំទឹកចំនួន ៣លីត្រដាក់ស្លឹកតើយចូលទុកវាឲ្យពុះ រួចដាក់ស្ករសនិងអំបិលចូលកូរឲ្យរលាយ ហើយលើកឆ្នាំងចេញ បន្ទាប់មកដាក់ទឹកក្រូចឆ្មានិងទឹកឃ្មុំចូលកូររួចទុកវាមួយឡែក។

៣. ចំពោះទឹកប្រទាល យើងយកប្រទាលដែលចិតហើយមកដាំឲ្យពុះ ដោយដាក់ទឹកចំនួន២លីត្រ។ ពេលពុះហើយ យកទឹកទី១ដែលត្រៀមរួចហើយ មកចាក់ក្នុងឆ្នាំងដែលកំពុងដាំប្រទាលនោះ រួចទុកវាឲ្យពុះម្ដងទៀតជាការស្រេច៕

ប្រភព៖ Samphors cooking food