អភិបាលខេត្តព្រះសីហនុ ប្រកាសរកអ្នកជំនាញ ជួយដោះស្រាយបញ្ហាចេញស្នឹម​ រូបសំណាក «ព្រះថោងនាងនាគ»

ព្រះសីហនុ៖ ​ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានធ្វើការបង្ហោះនៅលើបណ្តាញសង្គមហ្វេសប៊ុក នៅព្រឹកថ្ងៃទី១៨ ខែកក្កដា ឆ្នាំ២០២២នេះ ​ដោយប្រកាសរកអ្នកមានជំនាញ ​ឱ្យជួយដោះស្រាយបញ្ហាចេញស្នឹម រូបសំណាកព្រះថោងនាងនាគ ដែលទើប​ដាក់ឱ្យដំណើរការកាលពីពេលកន្លងទៅនេះ។

​ឯកឧត្តម គួច ចំរើន បានសរសេរដូច្នេះថា៖ ប្រិយមិត្តណា​ មានជំនាញ​ មានបទពិសោធន៍​ ព្រះបាទព្រះថោង​ ​ធ្វើពីស្ពាន់​ ចាក់បេតុងខាងក្នុង​ ពេលត្រូវខ្យល់សមុទ្រ​ ចេញស្នឹមដូចនេះ​ ។ តើមានវិធីបែបណា​ ដើម្បីការពារ​ ទប់ទល់អោយបានល្អ​ មិនចេញស្នឹម​។ សូមជួយផ្ដល់យោបល់​ !

គួរឱ្យដឹងដែរថា រូបសំណាកព្រះថោងនាងនាគ មានកម្ពស់ ២១ ម៉ែត្រ នៅលើជើងទម្រកម្ពស់ ៦,៣៤ ម៉ែត្រ គឺជារូបសំណាកដ៏ធំបំផុតក្នុងប្រទេសកម្ពុជា។ ​រូបសំណាកនេះ ត្រូវបានកសាងរួចរាល់ និងដាក់ឱ្យដំណើរការ នៅលើទឹកដី នៃខេត្តព្រះសីហនុ ដែលបានទាក់ទាញនូវចំណាប់អារម្មណ៍ពីភ្ញៀវទេសចរណ៍ជាតិ និងអន្តរជាតិអញ្ជើញ មកទស្សនា និងថតផ្តិតយករូបភាពយ៉ាងច្រើនកុះករនាពេលបច្ចុប្បន្ន៕