៤ហេតុផល ដែលមនុស្សស្រី គួរចេះរកលុយខ្លួនឯង

យល់ដឹង៖ ទោះកើតមកជាមនុស្សស្រី ដែលជាភេទទន់ខ្សោយជាងមនុស្សប្រុសក៏ពិតមែន តែមិនមែនបានន័យថាមនុស្សស្រីគ្មានសមត្ថភាពស្មើនឹងមនុស្សប្រុសនោះទេ ឱ្យតែមនុស្សស្រីចេះប្រឹងប្រែងដោយខ្លួនឯង និងមិនចាំតែពឹងផ្អែកទៅលើមនុស្សប្រុស។

ដូច្នេះហើយ មនុស្សស្រីគួរណាតែចេះរកលុយខ្លួនឯង កុំចាំតែពឹងលើលុយរបស់គេ ព្រោះថាចាយលុយរបស់គេ វាមិនស្រួល ដូចជាចាយលុយដែលរកបានមកដោយកម្លាំងញើសឈាមខ្លួនឯងទេ លើសពីនេះ វាក៏មានហេតុផលជាច្រើន ដូចដែលបានរៀបរាប់នៅខាងក្រោមនេះទៀត ដែលអ្នកគួរតែចេះរកលុយខ្លួនឯង។

៥ហេតុផល ដែលមនុស្សស្រីគួរចេះរកលុយខ្លួនឯង៖

១. មានភាពឯករាជ្យ

ហេតុផលដែលមនុស្សស្រីគួរតែចេះរកលុយដោយខ្លួនឯង គឺមកពីការដែលចេះរកលុយ វាបានបង្រៀនឱ្យមនុស្សស្រីគ្រប់រូបមានភាពអត់ធ្មត់​ ចេះតស៊ូនិងប្រឹងប្រែងខ្លាំងជាងមុន និងមិនចាំបាច់តែពឹងពាក់លើអ្នកណា ហេតុនេះមនុស្សស្រីនឹងក្លាយទៅជាមនុស្សស្រីម្នាក់ ដែលមានភាពឯករាជ្យ និងអាចធ្វើរឿងគ្រប់យ៉ាងបានដោយខ្លួនឯង។

២. អាចចិញ្ចឹមខ្លួនឯង

សម្រាប់មនុស្សស្រី ការដែលចេះរកលុយបានដោយខ្លួនឯង វាមិនត្រឹមតែបង្ហាញពីសមត្ថភាពពូកែរបស់មនុស្សស្រីនោះទេ តែវាក៏បានជួយធ្វើឱ្យមនុស្សស្រីអាចចិញ្ចឹមខ្លួនឯងបាន ដោយមិនចាំបាច់ពឹងលើគ្រួសារ ជាងនេះទៅទៀត អាចជួយសម្រាលបន្ទុកនៅក្នុងគ្រួសារទៀតផង ទើបមនុស្សស្រីគួរតែចេះរកលុយដោយខ្លួនឯង កុំចាំតែចាយលុយអ្នកផ្ទះ។

៣. អាចបំពេញក្តីស្រមៃខ្លួនឯង

ទោះរបស់ខ្លះ យកលុយទៅទិញមិនបានក៏ដោយ តែប្រសិនបើគ្មានលុយ ក្តីស្រមៃនិងអ្វីដែលចង់បាន វាក៏មិនងាយស្រួលក្នុងការយកបានដែរ អញ្ចឹងហើយ មនុស្សស្រីគ្រប់រូប កុំរំពឹងចង់ឱ្យអ្នកដទៃមកបំពេញក្តីស្រមៃរបស់អ្នក អ្នកត្រូវចេះបំពេញក្តីស្រមៃដោយខ្លួនឯង ដោយយកការប្រឹងប្រែងរកលុយខ្លួនឯងយកមកបំពេញ ទើបជីវិតមានន័យ។

៤. ជីវិតរស់នៅកាន់តែល្អប្រសើរ

ជាការពិត ការដែលមានលុយ និងលទ្ធភាពគ្រប់គ្រាន់ វាពិតជាអាចជួយធ្វើឱ្យជីវិតរបស់មនុស្សស្រី រស់នៅកាន់តែល្អប្រសើរជាងមុនពិតមែន ព្រោះដូចដែលដឹងស្រាប់ហើយ សព្វថ្ងៃនេះ ប្រសិនបើរស់នៅក្នុងជីវិតដែលគ្មានលុយ គឺវេទនាណាស់ ដូច្នេះមនុស្សស្រី បើចង់បានជីវិតរស់នៅល្អប្រសើរ ត្រូវចេះខិតខំរកលុយដោយខ្លួនឯង៕