ភ្នំពេញ៖ នៅមិនឆ្ងាយប៉ុន្មានពី កណ្តាលនៃរាជធានីភ្នំពេញ ឆ្លងកាត់តាមស្ពានជ្រោយចង្វារ ហើយបន្តដំណើរ តាមផ្លូវជាតិលេខ៦A ប្រហែលជា២០នាទី យើងនឹងធ្វើដំណើរទៅដល់ ផ្ទះរបស់ប្អូនប្រុសមួយរូប ដែលកំពុងតែមាន ភាពល្បីល្បាញ លើបណ្តាញសង្គមដែល អ្នកគ្រប់គ្នាបានស្គាល់ថា ជាក្មេងប្រុសដែល មានមាឌតូច ចិត្តខ្លាំង ឆន្ទះខ្ពស់ តាមរយៈការចូលរួមប្រណាំងកង់ ដោយយកកង់កញ្ចាស់ ដាច់ហ្វ្រាំងអត់ស្បែកជើង គ្មានមួយកសុវត្ថិភាព ទៅចូលរួមប្រកួត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
តែបើទោះបីជាបែបនេះមែន ក៏ក្មេងប្រុសម្នាក់នេះ នៅតែមិនចុះចាញ់នោះទេ រហូតខំប្រឹងប្រកួត ទទួលបាននៅជ័យលាភីលេខ៦ ក្នុងចំណោមក្មេងៗ ដែលចូលរួមប្រកួតដទៃ ជាច្រើនទៀតផងដែរ។
កុមារាពេជ្រ ភារា អាយុ១៣ឆ្នាំ បាននិយាយថា មុនពេលដែលទៅ ចូលរួមប្រកួតខ្លួនគ្មានជំនឿចិត្ត ថានឹងទទួលបាន នៅជោគជ័យនោះទេ។ ព្រោះខ្លួនគ្មានសម្ភារៈ និងមានការហ្វឹកហាត់ ដូចអ្នកដទៃៗទៀត។ ក៏ប៉ុន្តែដោយសារតែ ទឹកចិត្តស្រលាញ់ មិនព្រមចុះចាញ់ រួមទាំងការចង់សាកពី សមត្ថភាពផ្ទាល់ខ្លួនផងនោះ ទើបបានជាខ្លួន ប្រថុយយកកង់ចាស់ ទៅចូលរួមប្រកួតជាមួយគេ។
ជាក្មេងដែលកើត ក្នុងគ្រួសារក្រីក្រមានជីវភាព ខ្វះខាតអ្នកមា្តយក៏ មានជំងឺជាប់ខ្លួនភារា ដើម្បីបានកង់ជិះទៅរៀន និងចូលរួមប្រកួតដូចគេ កុមារារូបនេះ ត្រូវធ្វើការសន្សំ លុយដោយខ្លួនឯង ដោយការទៅយាមស្បែកជើង នៅតាមវត្តពេលមាន កម្មវិធីបុណ្យទានម្តងៗ រហូតសន្សំបានលុយ២០,០០០ម៉ឺនរៀល ហើយយកលុយនោះទៅទិញកង់ចាស់ មួយនេះពីអេតចាយ។
ងាកមកអ្នកម្តាយរបស់ កុមារាពេជ្រ ភារា វិញអ្នកស្រី ក៏បានលើកឡើងផងដែរថាលោកស្រី ផ្ទាល់មិនដឹងនោះទេថា កូនស្រលាញ់និង បានទៅចូលរួមប្រកួត ការជិះកង់នេះ។ ព្រោះកន្លងមក ក៏មិនដែលបានលឺ កូនប្រុសនិយាយអ្វីដែរ។ ក៏ប៉ុន្តែ អ្នកស្រីក៏បានសម្តែង នៅក្តីរំភើបនិង ការអរគុណយ៉ាងខ្លាំង ដែលការតស៊ូរបស់ កូនប្រុសខ្លួនបានធ្វើឲ្យរំភើប ដល់សប្បុរសជនទាំងអស់គ្នា មកជួយឧបត្ថម្ភដល់ កូនប្រុសនិង គ្រួសារលោកស្រីដែល កំពុងតែខ្វះខាតបែបនេះ។
មិនខុសគ្នាប៉ុន្មានពី អ្នកម្តាយខាងលើទេ លោកឳពុករបស់ភារា ក៏បានរៀបរាប់ ទាំងក្តីរំភើបផងដែរថា ខ្លួនពិតជាត្រេកអរយ៉ាងខ្លាំង នឹងការខិតខំប្រឹងប្រែ របស់កូនប្រុសខ្លួនរហូត បានធ្វើឲ្យរំភើបដល់ សាធារណៈជននិង សប្បុរសជន ជាច្រើនបែបនេះ។ ហើយទៅថ្ងៃអនាគត លោកក៏នឹងនៅតែបន្ត ជួយជ្រុមជ្រែងដល់ កូនប្រុសរូបនេះលើវិស័យនៃ ការប្រណាំងកង់ បន្តទៅទៀតផងដែរ ប្រសិនបើកូនប្រុស របស់លោក នៅតែស្រលាញ់។
ជាចុងក្រោយនេះ ប្អូនប្រុសភារា បានផ្តាំផ្ញើទៅកាន់ក្មេងៗ ដទៃផ្សេងទៀតផងដែរថា បើស្រលាញ់ហើយ ត្រូវតស៊ូ កុំចុះចាញ់ កុំខ្មាស់អៀន ទោះបីយើងមិនមានដូចគេដទៃទៀត ក៏ដោយ ហើយប្អូនក៏នឹង ខិតខំតស៊ូហ្វឹកហាត់ បន្ថែមទៀតដើម្បី ចូលរួមប្រកួត លើកក្រោយទៀត រហូតទទួលបាន ជ័យលាភីផងដែរ៕
Bong I.T